Plantun de Prouvènço

Pèr coumpara dos planto d'encò nostre

Diplotaxis tenuifolia & Euonymus europaeus

Rouqueto-jauno

Diplotaxis tenuifolia

Brassicaceae Cruciferae

Àutri noum : Rouqueto, Rouqueto-fèro, Pito-galino, Rouqueto-sóuvajo.

Noms en français : Roquette jaune, Diplotaxis à feuilles ténues.

Descripcioun :
La rouqueto-jauno se plais proche dis oustau e dins lis escoumbre. Es uno planto renadivo d'un verd un pau sourne e di fueio dressado. Se recounèis majamen à sa forto oudour que pòu pas engana quouro fretas si fuèio, e à si pichòti flour jauno en crous.

Usanço :
Ei di proun acampado coume ensalado champanello qu'adus un bon goust un pau fort. La poudès mescla emé de coustelino, d'aurigo, de lachugo-fèro vo d'àutris ensalado mai douço o peréu assaboura un pau vosto ensalado de culturo.

Port : Erbo
Taio : Pancaro entresigna
Fueio : alterno
Tipe bioulougico : Camefite
Cicle bioulougico : Planto renadivo

Gènre : Diplotaxis
Famiho : Brassicaceae
Famiho classico : Cruciferae

Coulour de la flour : Jauno
Petalo : 4
Ø (o loungour) flour : Pancaro entresigna
Flourido : Printèms Autouno

Sòu : Ca
Autour basso e auto : Pancaro entresigna
Aparado : Noun
Remarco : Ensalado champanello

Liò : Escoumbre e proche dis oustau - Champ - Ribiero
Estànci : Termoumediterran à Mountagnard
Couroulougi : Pancaro entresigna
Ref. sc. : Diplotaxis tenuifolia (L.) DC., 1821

Bounet-de-capelan

Euonymus europaeus

Celastraceae

Àutri noum : Fusan, Coulougnet, Grano-pesoulino.

Noms en français : Fusain, Fusain d'Europe.

Descripcioun :
Lou bounet-de-capelan es un aubret que trachis dins li relarg fres e proche d'aigo. Fai de fueio longo de 2 à 10 cm e de pichòti flour en crous de 6 à 10 mm. Mai se recounèis subretout emé si fru que sèmblon li bounet que pourtien, à passa tèms, li capelan. Aquéli soun roso e quàsi redoun sus lou dessubre e caupon 4 grano. Coumpara emé lou bounet-de-capelan-di-làrgi-fueio qu'èi pentamèro.

Usanço :
Couneissèn pas d'usanço particuliero en Prouvènço pèr aquelo planto. Pamens se saup qu'es emé soun bos cabounisa que se fai lou fusan pèr lou dessin. Dins d'ùni relarg se servien di fru pèr tencha en rouge.